Article المقال ( Fevrier)

 ... ايـــــــوه انا الكائن العـــــــانس

بقلم

نانسي أيوب

)) ايـــــــوه انا الكائن العـــــــانس.. يشرب..ينام .. وأحياناً بائس . . لانه يشعر كبقية الكائنات

لا لا لا ماتقلقوش مش مقاله كئيبه ونقعد نعيط جانب الحيط ..ونشد شعرنا.. ابسولتلي نوت : ))

دي رساله مانعه نفسي اكتبها بقالي فتره.. بس يــلا بقى محدش واخد منها حاجه..

رساله للناس اللي على لسانها كلمة مش هنفرح بيكي بقى. .

رساله لكل واحده بتتخطب وتخاف تقولك لا تزعلك.. أو تغيري منها وتفقري عليها. .

رساله لكل واحده متجوزه وتبصلك بشفقه وتمصمص شفتها قال يعني صعبان عليها حالك. .

ماتاخديــش في بــالك ..على فكره انا نفسي مش زعلانه لو انتي زعلانه ححلهالك:)) وخساره شفايفك تبوظ من المصمصه : ))

رساله لكل القرايب اللي معتبرينك شيء للفرجه وللعرض ..ابوس ايديكوا انا مبسوطه كده بلاش المناظر اللي بتجيبوهالنا.. انا مش ناقصه هطل..كفايه اللي عندي. .

رساله لكل واحده بتخاف على عيالها منك لانها فاكره انك هتحسديهم علشان لسه مخلفتيش.. ابسولتلي نوووت ..عيالك اصلا يكَرهوا الواحد في الخلفه واللي عاوز يخلف . .

على فكره . . لما بحضر فرح . . فعلاً من قلبي بكون فرحانه ومبسوطه . . وكأنه فرحي . .

الحاجه الوحيده اللي بتزعلني ان أبويا مش هيكون موجود يوم فرحي ويوصلني . .

لما بلعب مع عيالك مش معناها جوايا اني بحسدهم . .لكن معناها من حبي ليكي حبيتهم . .

لما بحضر خطوبه.. برضه بكون فرحنالك مش بتمنالك تفركشي علشان تبقي زيي..

  )) لما عَيروني بكلمة عـــانس . . فاكرين اني هدمع في ثواني وان الكلمه هتهز كياني .. ))

عادي جداً على فكره . . انا أصلاً بقولهالي . . من نفسكم تقولوها . . لا هي شتيمه ولا هتلزق يعني . . أصل الشتيمه بتلف تلف وترجع لصاحبها : ))

بالنسبه لي كلمة "عـــانس" بقيت بفتخر بها بعد ماكانت بتضايقني . . لاني برغم كل

الضغوطات . . والكلام اللي بيتقالي ليل نهار . . أوقات بيــوجــع ! ! . . لكن مابقتش بنــهار . .

 )) بفتخر بها لاني مافـــرطُش في قلــبي لأي حــد معـــدي  . . ))

)) بفتخر بها لاني مــارضيــتش بشـخــص . . نــاقص . . يظــهـــر . . بعكــــس اللي مـخـــبي . ))

)) بفتخر بها لاني مــارضيــتش بشـخــص .. كان بيمثل الحــب .. علشان مصلحه او تضييع وقت.. ))

 ))بفتخر بها لاني مــارضيــتش اكون نايمه جانب جوزي بالاسم وفكري ومشاعري مع حد تاني.. ))

 ))بفتخر بها لاني مــارضيــتش اكون واخده لقب متجوزه وبخون جوزي في كل لحظه وفرصه معديه .. ))

 "على فكره الخيانه اليومين دول بقت شيك اوووي إشي واتساب على مسج ات وربنا يباركك يا مارك زوكربيرغ انت وبريان أكتون وصاحبك جان كوم  .. "

على فكره العانس دي: ياما وقفت في المستشفيات تستنى ولاده ولاد اصحابها و كأنهم اولادها واحيانا بتروح بيهم مع الام للدكتور بدل أبوهم ..

العانس دي : ياما بنشيل هم أهلــنا ليل و نهــار ولا حد حــاسس بينا وعلى طـــول في هــزار . .

و بدعي ربنا يسيبلي السند الوحيد اللي فاضلي في الدنيا . . لاني فعلاً ساعتها هكون لوحدي . .

العانس دي: أصلها مسترجله..ايوه أنا مسترجله..وبسمعها كثـــير ومش مضايقاني خلاص تخطينا المرحله دي..

بس الناس المحترمه بتقولها بطريقه تانيه:

"بنت من جوه راجل ومن بره تشيلك وقت الزنقه . . الراجل ممكن يلجألها و هو عارف انها هتسد . . عايـــشه حيــاتها و بتعمل اللي يريـحها من غير مــا تيـجي على حد . . الناس و كلامهم آخر همها."

صعبان عليا أن في بنات في سني مش عارفين قيمتهم و فاكرين العمر وقف عند سن معين و هاتك يا إحبــاط من بتـاع انا كــبــرت .. على فكره مش عاوزه اعرفكم خااالص ..مش ناقصه كآبه..عندي كثييير لو عاوزين تعالوا اديكم شويه زياده..

بموت من الضحك علي الكلام اللي بسمعه عن نفسي . . لكن عارفه ان كل شئ قسمه و نصيب . . والنصيب لسه مجاش . . اقعد بقى حاطه ايدي علي خدي . . و لا اعيش و احاول افهم رسالتي في الدنيا . . وان ممكن يكون فى حاجه غير الجواز ربنا كتبهالي . .

يمكن انحرف . . احترف الرقص مثلاً. .

بهرج على فكره علشان الناس اللي هتسيب الكلام كله وتمسك في الحته دي..

بموت من الضحك لما الناس تقولك دي في الثلاثين . . أوبـــا ا ا دي كبرت ! !

وبضحك اكثر لما نموت في سن الثلاثين . . والناس تقولك يا خـــساره ماتت في عز شبابها ! !

ماترسولكم على بر . . أنا كبرت ولا لسه في عز شبابي ! ! !

تقول ايه يا اخي مجتمع عقيم . . بيقيم الجواز على انه الكمال و من غيره انتى ناقصه . . نـــاقصه نـــاقصه . . يعني الزايدين عمالنا بيهم ايــــه J ))

بس خلّي بالك ياعانس اللي هي زيي كده يعني : ))

ممنوع تفتحي بقك و تشتكي من اي حاجه تعباكي . . او مزعلاكي . . او شعور مضايقك. . او كلمه وجعتك . .

لان الكلمه اللي هتلاقيها: "دي تحمد ربنا بعد كـــووووول ده انها بطولها و لا شايله هم ولا مسئولية حد . . وراها ايه يعني . . دي عايشه ضحك على طـــول الخط وعايشه حياتها بالطــول والعــرض . . وعايشه في مية البطيخ من وجهة نظر كوكب الـــ...... همشيها بطيخ علشان الرقابه بس: )) "

وياسلام لو شافوكي لابسه يوم حاجه مختلفه ويشوفوا ابتسامه على وشك . .

فــجأه شارلوك هولمز وقصص رجل المستحيل وتان تان تبدأ ويقولوا:

أكيد في حياتها ســر . . وأضحك انا من جوا عل الـســر اللي انا اساساً معرفهوش وأضحك من جوا، عشان عارفة إن أكبر ســر بيهدد حياتي إن ما عنديش ســر أصلاً . .

أيتها العانس اللي زيي كده برضه : ))

نصيحه بعد خبره طويله وإحباطات كثيره . .

عيشي بمعنى الكلمه . . سافري . . ســـافري لوحدك . . انطلقي . . اتجنني . .

اعملي حاجات عمرك مااتصورتي تعمليها . .

قولي اللي انتي حساه من غير ماتخافي من تعليقات الناس . .

احترمي اراء الناس بس خديها نصيحه مش كل الكلام ينفع يتسمع من أصله . .

كوني مستمعه جيده اكثر من متكلمه . .

خدي وقتك في الصمت . . بمعنى أدق في الصمت جمال مش هتعرفيه غير لما تختبريه بجد..

صعب شويه اللي هقوله بس حاولي دائماً تبتسمي حتى لو حاسه عكس ده هتلاقيكي بعد فتره بتضحكي بجد من غير سبب . .

على فكره الضحك من غير سبب مش قلة أدب . .لكن أوقات كثير بيعبر على وجع بجد . .

حِبي من كل قلبك . . لكن ماتقعيش في نفس الغلطات . .

ماتضحكيش عليا ! ! بس ماتحبيش بجد . . اصل الجد ده بيوجع اوووي مع الوقت . .

مايهمكيش من الناس اللي في حياتك كانت محترفه التمثيل والخداع . .

مايهمكيش من كلام الناس . .

مايهمكيش حد ماقَدرش حبك . .

مايهمكيش من اللي خـَــان . .

مايهمكيش من اللي مـاصـانـش العـِشره وبـــاع . .

مايهمكيش من حـــب حقـيقـي عِشتيــه وضـــاع . .

مايهمكيش من اللي حسسك بمعنى كلمة "الخــزلان" . .

أيــتـهـا الــعـــانـــس . . الأصيلة من الخيــول مايليق بمستواها ..الا . . فـــــــارس.