Article المقال ( Septembre )

 

ايها السعداء ؟ نحدثكم من عنبر العقلاء ؟

 

 

بقلم : رفيق وجيه

 

 

الغالبيه العظمي مننا مش سعداء بشكل خاص ، وفيه قطاع كبير مكتئب . وفيه مجموعه صغيره من البشر مبسوطه ومبهجين جدا جدا في حياتهم . يُعتقد ان دول تحديدا بينتهي بيهم المطاف بمأساة او قصه ملحميه مليانه مآسي .

اغلب الناس بتتنقل من مرحله لمرحله في حياتهم من غير مايتسمتعوا باي جانب من حياتهم وده لان حاجات قليله جدا بيستمتعوا بيها ووقتها قليل جدا " قصير " وفي الاغلب بيتم نسيانها بشكل اسرع من البلاوي والمآسي .

حنسميها التعاسه والبشر دي في دايره من التعاسه وعدم الرضا ورغم ده قليل جدا فيهم اللي بيغير وضعه او الطريقة اللي بيعيشها .

واسوأ نوع هو البشر اللى بيحاول يغير طريقه ويفشل فيتبقي عندهم الشعور بالفراغ . علشان كده بتوع الموارد البشريه لما بيحبوا ينصبوا علي الناس فبيشغلوهم بعمل اي شئ ونفس المبدأ موجود في المؤسسات اللي بتميل لان البشر تخدم فيها مجانا بشكل خاص .

طيب لما بنلاقي شخص بيقول " حاسس انهرده بسعاده مالهاش وصف " لانه مثلا حقق حاجه كان نفسه يحققها والاحساس ده بيجي مع الاحساس بالراحه . فده لان البشر عندهم رغبات وتوقعات عاوزين يحققوها ، حتي لو تعارضت الرغبات دي او التوقعات دي مع بعضها ، فمثلا لو تحققت رغبه فوارد جدا الرغبه دي تولد رغبه تانيه وممكن تولد صراع داخلى جوه الانسان وبالتالى تحسسه في نفس الوقت بالتعاسه . مثال : واحد نفسه يحب تاني غير مراته وحقق ده وحب تاني " اهو هنا متجه للسعاده " حيظهر جواه صراع يحول السعي للسعاده ده لنار من التعاسه وهكذا . فهنا السعاده مش مجرد رفاهيه عاطفيه . دي سعاده حلوه لناس كتير لكننا لازم نفهم انها سعاده ساعة تيجي وساعة تروح . وان الاستقرار بيموت السعاده دي .

اغلب الناس بتعيش وتموت مع اسئلة ابسط من كده او مسائل مش بالصورة دي من التفكير زي المعني والهدف والغرض الخ .

خلونا نفكر في الحاجات اللى بتخلي البشر سعيده زي مثلا " ناس بتدور علي الحب بس ايه هو الحب بالظبط ؟ عاوزين اللى يحبهم ويقدرهم بس ليه ؟ بيحسوا بالسعاده علشان في اخر تقبلهم زي ماهما ؟

طبعا من المفاهيم الموجوده بغباء ان الثروة بتخلى الانسان سعيد !! لكن الموضوع حقيقي هو برضوا شكل من اشكال الحب في الوجود ؟ الناس دي عاوزه الناس اللى حواليها تقدرها وتعجب بيها وده من اسلوب حياتهم ومن ممتلكاتهم . فايه اللي يميز انك او غيرك يمتلك حاجات كتير لطيفه وجميله وغاليه بس حقيقي مالهاش استخدام اوي او بتضيع وقت الخ . يعني النظام الرأسمالى مبني علي السعى الدائم لشرا حاجات مش محتاجينها لمجرد انها تسعدنا .

شويه ناس تانيه بتدور علي السلطه لكن السؤال ايه هدف الناس دي من القوة ؟ يعني ايه السعاده في ان بشر تسعد وتنشكح من التحكم في الاخرين ؟ تفتكروا ده برضوا شكل تانى من اشكال الحب ؟

فيه ناس بتسعي للشهرة ، وده انسان بيلاقي السعاده في انه يكون محبوب او مجرد معروف من البشر التانيين !!

طيب تبقي السعاده شئ تخيلي ذاتي او داخلى وقد تكون السعاده هي انها حاله بتخليك راضي عن نفسك ، وده حيجي لما زاد ادراكك مع الوقت وهي القدره علي التغيير في الحياه .

يبقي نسأل هل دايما التطور في صالح الانسان علشان يوصل لسعادته ، ومش احنا بس اللي بنبص لمستقبلنا فالنمل مثلا هو كمان بيحوش الاكل علشان لما يحتاجه يلاقيه . ففكره اننا بنرتب للمستقبل فمنه نلاقي سعاده مش اختراع بشري صرف .

ومن هنا نسأل هل السعاده حاجه كويسه ؟ طيب هي لو كويسه مش المفروض نتمني السعاده دي لكل البشر ؟ وهل حنجبر الناس علي افعال بعينها علشان كلهم يبقوا سعدا ؟ طيب وهل الفعل ده حيبقي بالنسبة للكل صحيح يعني الفعل ده مش حيولد اى خساره لاي بشري تانى ؟

كل اللى فات في عقل طفل يجوز !! لكن لما تكبر حتفهم ان السعاده شئ ذاتي ، لان وارد جدا السعاده بالنسبه لشخص ما هي تعاسة بالنسبه للاخر .

الخلاصه ان التكنولوجيا مش حتخلينا اكثر سعاده بالعكس ، لان التكنولوجيا حتخلينا منفصلين اكثر عن بعضنا . وبنقضي وقت اقل مع حبايبنا واصحابنا وقرايبنا . مش حيبقي فيه رفاهية شعورنا بالملل ، لان الملل مصدر اصيل من مصادر الابداع . ونتيجته كانت دايما سعادة

طيب والجواب ايه ؟

الجواب بسيط وهو اننا لازم نفكر نفسينا بامكانيتنا ونسعي لتطويرها وان فكره اننا بنتطور تبقي اساس لسعينا في وقت وجودنا هنا